فَرج أسلوب حياه

-يعنى مش ناوية تعترفى! مين وراكم؟ مين بيموّلكم؟

-أنا الوطن أغلى عندى من أى بتنجان يا مٌحسن بيه ..

-كده! ياااااا فرج!!

وبالنداء, بنتنتهى المحادثة الأسطورية الهُلامية اللى جمعت ظابط أمن الدولة "كمال الشناوى" بالمناضلة الثورية اليسارية "سعاد حسنى", واللى بيدور أصلاً حول محاولات سيادة الظابط فى إنتزاع إعترافات حول التنظيم اللى خلاّهم يطلعوا بالمظاهرة, ولما بترفض الأستاذة سعاد بيلجأ الظابط لإستخدام سلاح الخوف فى إنه يستدعى الدولاب الأدمى أو المخبر "فرج" اللى كل مٌهمته كانت بتتلخص فى إنه بيعد يجرى ورا سعاد حسنى فى الأوضة يقطلعها هدومها وهى تعد تصرّخ.

بالخروج من كادر المشهد الضيق ده والنظر لفرج كـمبدأ مش كدولاب أدمى هنلاقى الأتى:

1-كل واحد فينا عنده فرج الخاص بيه.

2-لو إنت طالب فاشل فرج بتاعك هيتمثل فى المدرس اللى بيروٌقك عشان مش بتذاكر, والإمتحان اللى هتجيب فيه درجة منيّلة بنيلة, والدرجة المنيّلة بنيله اللى هتدى مبرر لولى أمرك بالإعتداء الشرعى عليك.

3- لو إنت طالب بتذاكر ومتفوّق وإبن ناس, فرج بتاعك هنا هيكون متمثل فى إنك خايف متجيبش مجموع كلية ألسن أسوان اللى نفسك تدخلها من وإنت بتحبى وبتتف على عمو, وساعتها هتضيع بردوا من وجهة نظرك.

4- لما تدخل الكلية هتلاقى "توو مانى فرج" .. فرج البنت اللى مُعجب بيها وخايف تكلمها, فرج الدكتور اللى بيروقكوا فى الإمتحانات, فرج التقدير اللى خايف متجيبهوش فهطلع مش هتلاقى شغل كويّس.

5- وحتى لو ربنا إداك عمر وخلصت كليه من غير ما تحتاج حسابات السنة الضوئية (أربع سنين أخدتهم فى أربع سنين يعنى), فرج هيتمثل فى البنت اللى لازم تخطبها عشان كل يوم بيجيلها عريس او شغلك اللى هتعد تجرى وراه ولما تلاقيه هينتقل فرج تلقائيا من شغلك لمديرك أو عميلك فى أغلب الأحوال.

الموضوع كبير يا جماعه, فرج مش بس المُخبر اللى كان بيعتدى على سعاد حسنى طول الفيلم وبيمثلها الخوف اللى بيخليها تتكلم!

فرج جوانا كلنا, فرج هيفضل يعتدى علينا طول ماحنا سامحين ليه بكده! 

فرج هو الخوف.