مقال .. قصه قصيرة .. حاجة شبه كده
يوم طويل .. اكتر من انى اضيع كام سطر وأوصفلك كان عامل إزاى .. بس برغم كده قررت أروح مشوار خاص ..لمنطقة أبو قير .. ونظرا لانى ملقتش حاجة مباشرة تودينى هناك ومكنتش الميزانية تسمح أروح بتاكسى فركبت ميكروباص لحد مكان قريب من ابو قير .. ومن هناك ركبت حاجة تانية .. ووقع حظى مع سواق عَدى الخمسين بكام سنة كده ..ركبت جنبه .. وتالتنا كان ولد صغير مكملش 17 سنة
واستكمالا لعادتى انى ببقى مع نفسى اوى فى المواصلات .. طلعت النوتة من الشنطة وبدأت اكتب حاجات مش عايز انساها لبكره .. إندمجت مع نفسى اوى وفصلت من كل حاجة حواليا .. لحد ما قطع إندماجى ده جملة إتقالت بالإنجليزى وبلكنة مصرية لواحد متعود يتكلمها
"do yo smoke cigarettes .. you are too young to do that "
رفعت عينى مرة واحدة وبصيت للى حواليا .. لسه نفس السواق البسيط والولد الصغير المدخن اللى جنبى .. انا قولت مدخن ! وف لحظة أدركت مين قال لمين و ببص خبطتنى ابتسامة ثقة خفيفة ونظرة فى المرايا اللى جنبه .. وتابع
"I wish you stop this bad habit soon "
بدأ وشى ياخد انفعال التتنيح .. يمكن حافظلة كلمتين ولا حاجة ياعم عادى عادى ؟ إبتسامة السواق بدأت توسع وهو بيتابع
"Doivent s’attendre à cette mauvaise habitude"
وهنا .. ملامحى بدأت تاخد شكل السنجاب من الدهشة .. فرنساوى ده ! وكرد فعل على انفعالى ابتسامة السواق وسعت اكتر وهو بيتابع بلغة نوعا ما حسيتها ايطالى .. وكرر نفس الجملة اللى فاتت
" Deve fermare questa cattiva abitudine "
مازالت حواجبى ملامسة شعرى من الدهشة والانبهار بالراجل .. وعينيا مبحلقة .. وابتسامة الثقة والاعتزاز بالنفس اكلت كل وش الراجل وهنا .. قررت مكونش الجانب المتلقى واتخليت عن لامبالاتى المعهودة وانا بساله وبتنحنح عشان اضيع تأثير الإنبهار من حنجرتى : ” تلات لغات .. صح !؟ رد عليا وهو باصص على الطريق ومش
مدينى أدنى إهتمام : “الفرنساوى نص نص .. بعد اذنكوا يا حضرات * يرفع صوتة * هفٌول بس *
أستغليت وجوده بره العربية إنى أتأمل هدومه .. قميص نص كم مكوى .. ياقات نضيفة .. زراير كاملة .. حزام مفيهوش خدش وبنطلون جينز جديد .. نزل دقايق ورجع .. دور الموتور وطلع تانى .. وف محاولة منى على غير العادة فى تجاذب أطراف الحديث مع حد معرفوش
" هو مؤشر البنزين ده فيه مشكلة *بشاور على مؤشر البنزين لأنه متحركش بعد ما فول
*يرد بسعادة وانشكاح غير مُبرر" انت ماخدتش بالك .. انا محطتش بنزين اصلا .. العربية دى بتمشى بسولار ""والله ما أخدت بالى * معلش يا حاج انا كنت منبهر ومركزتش *
" gasoline is Fast flammable "*
O.o متنح تانى
"مستغربش اوى كده" ..
" I have a certificate in Chemistry "
ووالله مش من هنا .. من بره
O.o وانا أتنح …. !”
حضرتك إعذرنى .. بتتكلم اربع لغات ومعاك شهادة فى الكيمياء من بره مصر .. وشغال سواق !
وهنا أدركت انى رميت كلام دبش وميصحش .. ملامح بدأت تنكمش وبان عليه انه افتكر حاجات ضايقتة .. طرح نظره بعيد
سبعميه وخمسين جنيه ! لما جيت اشتغل فى بلدى بشهادتى كانوا عايزين يدونى الملاليم دى صمت .. محاولة منى لتصحبح غلطتى الشنيعه المريعه .. " حضرتك معاك لغات .. ليه مشتغلتش فى مكان سياحى .. الأقصر أسوان شرم الشيخ ""دول بالنسبالى غربة يابنى ""دول فى مصر بردوا مش غربة زى ماحضرتك فاكر ""بالنسبالى أنا غربه"
وسكت ..وحسيت من رد فعله بعدها انى جيت على الجرح ومشيت عليه بإديا ورجليا .. اتفتح فى الكلام عن شبابة وعيلتة وبناته اللى زعلانين منه انه مكملش بره .. والغجر اللى شغال وسطهم دلوقتى * وصف ارستقراطى للزملاء السواقين ” افتكر اخو مراته اللى طلع انصح منه وكمل عيشه بره .. حمد ربنا على الغلطة اللى حصلت وبسببها رجع مصر بدل ما يكمل فى اليونان.. وف نص الكلام مبينساش يشتم أى عربية بتكسر عليه بإيطالية أنيقة .. ولغه تانية صعبة جدا فعلا معرفتش أميزها *ارجح يونانية* .. ويرد على الركاب بمنتهى الزوق .. خليط من البساطة والأرستقراطية صعب تشوفة فى حياتك ماشى على رجلين !
" أنت نازل فين بالظبط ؟؟ "
.. سؤال أتبعه إصرار انه يوصلنى لحد المكان اللى انا نازل ادامه ويشرحلى همشى ازاى ..استغربت من الشهامه المبالغ فيها دى ؟ وكأنه لمح فى عينى التساؤل ده .. ابستم .. وإبتسمت لفراسته .. على حد وصفه .. مركبش معاه حد من فترة فهم هو بيقول ايه اصلا.. نزلت بصيت نظره اخيرة على السواق .. ملامحه رجعت لعادتها من الهم والحزن .. وعنيين بتراقب الطريق عشان يلف بالعربية .. وميمنعش شتيمة
:) ايطاليانى كده لو تاكسى زنق عليه
*ملحوظة * الجمل المكتوبة بالأعلى باللغتى الفرنسية والإيطالية تم الإستعانه فيهما بمترجم لجهلى الشديد باللغتين
تعليقات
إرسال تعليق